薄扶林村剪影

第一次聽呢個地方係因為中秋舞火龍,多年前中秋去過一次觀摩,但都只係停留喺村口薄扶林道…

之前上網睇關於條村嘅wiki,原來呢個聚落有幾百年歷史,看見現在村落的樣子,很難想像到幾百年前呢個聚落嘅模樣,同埋以前嘅人喺度嘅生活。

呢次係第二次真正行入條村影相,發現草蘆竟然唔係用草搭建,又發現喺士多招呼我嘅老人家,係親戚嘅疏堂親戚。據聞老人家佢包餃子有一手,我都即刻話俾佢聽老人家仲好好精神呀!

村對面的古跡最近開放俾公眾參觀打咭,當日見面的ig影友話那古蹟係牛奶公司「高級」職員宿舍,我比較有興趣嘅反而係喺村入面兩幢牛奶公司「普通」員工宿舍之後會點…

可惜嘅係,呢啲喺市區歷史悠久嘅鄉村(例如衙前圍、牛池灣、茶果嶺等等),喺行政角度嚟睇只係「等拆」嘅寮屋區,又有幾多無形嘅文化歷史遺產可以保留落嚟?

2022年5月 薄扶林村
Nikon FE2 | Nikkor-H 28mm f/3.5
Fujicolor Superia X-TRA / Ilford Delta 400

你有懷舊思鄉症嗎?

2010年11月 尖沙咀
Yashica Electro 35 GSN / Fujicolor Superia X-TRA

過去的十月尾突然傳出海安㗎啡室結業消息,網上出現一遍「哀嚎悼念」,社交媒體出現好多海安的相片,小弟的網誌亦重新出發,將第一篇獻俾呢間69年歷史的冰室。

同時,油麻地另一間老茶記大安茶冰廳,亦因為「店主移民」亦悄悄關上大門,社交媒體上也有零聲的「悼念」。幾日之後渣哥亦宣佈灣仔分店即將結業,老闆勸大家不要特意幫襯,應該支持其他小店。

圖片來源:餓底TV

唔知大家聽到大渣哥茶記結業,同聽到海安/大安結業,心情感覺係咪截然不同?如果你仲有一次機會,你會想幫襯海安/大安,還是大渣哥?相信好多人同我一樣,會選擇海安㗎啡室/大安茶冰廳,因為呢兩間好有歷史,想去感受一下「老香港」既味道。

問題來了,兩間老茶記歷史超過五、六十年,比我們年紀還要大,自己都只係幫襯過四、五次。點解我地會對結業消息有咁大反應?點解我們無親身體驗過五、六十年前「老香港」,卻執意想懷上一代的舊?

2011年11月 油麻地
Fujifilm Zoom Date 1300 / Kodak Ultramax 400

1688年一位瑞士醫生 Johannes Hofer 將兩個希臘文詞語 nóstos (homecoming) 同 álgos (pain) 組成 Nostalgia。當時 Hofer 留意到有士兵因為長期在外,思鄉的愁緒嚴重影響心理生理。Nostalgia 「思鄉症」被認為係一個嚴重疾病,唯一既「醫治」方法係返屋企…

2009年12月 旺角
Holga 135 / Fujicolor Superia X-TRA
2012年9月 官塘物華街臨時小販市場
Fujifilm Zoom Date 1300 / Lomography CN800

以上提出的問題,每一個人的答案都可能不同,但這一切都係關於個人身份認同。隨著熟悉的香港一直消失,相信我們即使身處香港,Nostalgia 只會越來越嚴重,也不見得有希望可以「醫治」得到。

在此唯有祝福各位平安。

2011年3月31日 紅磡碼頭
Yashica Electro 35 GSN / AgfaPhoto Vista 400
%d 位部落客按了讚: